वेतनविलंबासह शिक्षकांच्या प्रश्नांना मिळणार न्याय

1. वेतनविलंबासह शिक्षकांच्या प्रश्नांना मिळणार न्याय

ऋषिकेश दादा लाड यांच ग्वाही; प्राथमिक शिक्षक समितीच्या निवेदनावर चर्चा

सांगली : प्रतिनिधी

सांगली जिल्हा परिषद अंतर्गत कार्यरत प्राथमिक शिक्षकांच्या वेतनविलंबासह विविध प्रलंबित प्रश्नांना आता न्याय मिळण्याची अपेक्षा निर्माण झाली आहे. महाराष्ट्र राज्य प्राथमिक शिक्षक समितीच्या वतीने शिक्षकांच्या विविध मागण्यांचे निवेदन जिल्हा परिषद उपाध्यक्ष तथा शिक्षण सभापती ऋषिकेश दादा लाड यांना देण्यात आले. यावेळी शिक्षकांच्या प्रश्नांवर सविस्तर चर्चा करण्यात आली असून, सर्व प्रलंबित प्रश्नांचा गांभीर्याने विचार करून ते तातडीने सोडविण्यासाठी आवश्यक ती कार्यवाही करण्यात येईल, अशी ग्वाही ऋषिकेश दादा लाड यांनी दिली.

गेल्या काही काळापासून प्राथमिक शिक्षकांना वेतनास विलंब होत असून, त्याचबरोबर विविध प्रशासकीय प्रश्न प्रलंबित असल्याने शिक्षकांमध्ये नाराजीचे वातावरण आहे. शालार्थ प्रणाली कार्यान्वित असतानाही वेतन वेळेवर होत नसल्याने शिक्षकांना आर्थिक अडचणींचा सामना करावा लागत आहे. त्यामुळे प्राथमिक शिक्षकांचे वेतन प्रत्येक महिन्याच्या पहिल्याच तारखेला अदा करण्यात यावे, अशी प्रमुख मागणी महाराष्ट्र राज्य प्राथमिक शिक्षक समितीच्या वतीने करण्यात आली.

शिक्षकांच्या न्याय्य व रास्त मागण्यांसाठी संघटनेच्या शिष्टमंडळाने जिल्हा परिषद उपाध्यक्ष ऋषिकेश दादा लाड यांची भेट घेऊन निवेदन सादर केले. यावेळी वेतनविलंबाचा प्रश्न, शालार्थशी संबंधित अडचणी तसेच शिक्षकांचे अन्य प्रलंबित प्रशासकीय प्रश्न यावर सविस्तर चर्चा करण्यात आली. शिक्षकांच्या समस्या ऐकून घेत संबंधित प्रश्नांबाबत सकारात्मक भूमिका घेतली जाईल, असे आश्वासन लाड यांनी दिले.

शिक्षकांचे वेतन वेळेवर मिळणे हा अत्यंत महत्त्वाचा प्रश्न असून, त्याबाबत कोणत्याही प्रकारचा अनावश्यक विलंब होऊ नये, अशी मागणी समितीच्या पदाधिकाऱ्यांनी केली. तसेच विविध प्रशासकीय कामांमुळे शिक्षकांना वारंवार कार्यालयांच्या फेऱ्या माराव्या लागू नयेत, यासाठी प्रलंबित प्रकरणांचा तातडीने निपटारा करावा, अशीही मागणी करण्यात आली.

शिक्षकांच्या प्रश्नांवर चर्चा करताना ऋषिकेश दादा लाड यांनी संघटनेच्या मागण्यांची दखल घेतली. संबंधित विभाग व प्रशासनाशी समन्वय साधून प्रलंबित प्रश्न सोडविण्यासाठी पाठपुरावा करण्यात येईल. शिक्षकांना त्यांच्या न्याय्य हक्कांपासून वंचित राहावे लागणार नाही, यासाठी आवश्यक ती कार्यवाही केली जाईल, अशी ग्वाही त्यांनी यावेळी दिली.

महाराष्ट्र राज्य प्राथमिक शिक्षक समितीच्या वतीने शिक्षकांच्या प्रश्नांसंदर्भात सातत्याने पाठपुरावा करण्यात येत असून, वेतनविलंबासह सर्व प्रलंबित प्रश्न मार्गी लावण्यासाठी संघटना प्रयत्नशील असल्याचे पदाधिकाऱ्यांनी सांगितले. उपाध्यक्ष तथा शिक्षण सभापती ऋषिकेश दादा लाड यांनी दिलेल्या सकारात्मक आश्वासनामुळे जिल्ह्यातील प्राथमिक शिक्षकांमध्ये समाधान व्यक्त होत असून, आता या प्रश्नांवर लवकरच ठोस निर्णय होण्याची अपेक्षा व्यक्त केली जात आहे.

यावेळी महाराष्ट्र राज्य प्राथमिक शिक्षक समितीचे जिल्हाध्यक्ष शशिकांत बजबळे, जिल्हा नेते माणिकराव पाटील, बोर्ड अध्यक्ष सदाशिव पाटील, जिल्हा सरचिटणीस राजाराम शिंदे, जिल्हा कार्याध्यक्ष प्रदीप मोकाशी, जिल्हा महिला आघाडीच्या जिल्हाध्यक्ष रागिणी पाटील यांच्यासह जिल्ह्यातील सर्व तालुक्यांचे अध्यक्ष, पदाधिकारी व कार्यकर्ते उपस्थित होते.